Gero eta fededun gutxiago joaten da elizara. Egoera horrek, ordea, konponbidea izan dezake Masaya herrian (Nikaraguako hiriburutik hegoaldera) gertatutakoa ikusita, dozenaka txakur joan baitziren elizara.

Jantzi koloretsuak soinean zituztela izan ziren urtero San Lazaroren omenez egiten den mezan.

Haurtxoz, pailazoz eta pertsonaia ezagunez mozorrotuta joan ziren batzuk. Beste zenbait, berriz, bulegari edo funtzionario jantzita bertaratu ziren.

Fededun ugari pilatu ziren bertan, errenkan, beren maskotak alboan zituztela, Nikaraguan animalien babesletzat duten San Lazaroren irudiaren paretik igarotzeko asmoz.

"Beti erregutzen diogu San Lazarori gure txakurtxoak babestu ditzan eta beti erantzuten digu", adierazi zuen eliztar batek. Bere txakurra hilzorian egon zenean, santuaren "mirakulu" batek salbatu omen zuen.