Deskripzioa eta oharrak:

Etxetzar hau eraikin lerro baten bukaeran dago, izkina eginez. Hareharrizko manposteriaz egina dago, eta hareharri landua dauka bao inguruetan, izkinetan, erlaitzean... Beheko solairuan, agerian du harri, eta goikoetan, berriz, igeltsuztatua du.

Alde nagusia modu simetrikoan antolatua du: lau solairu ditu, eta hiru bao ardatz bakoitzean. Beheko solairuan, sarbidea du erdian, eta leiho bat haren alde bakoitzean. Lehen solairuan, balkoi handi samar bat du erdian (erlaitza molduraz apaindua du), eta haren albo bakoitzean, beste balkoi bat, ez erdikoa bezain irtena. Bigarren solairuan, balkoi eder bat du alderik alde, eta, alde nagusia ez ezik, eskuineko angelu guztia ere hartzen du. Ganbaran, erlaitzaren azpian, hiru bao txiki ageri dira, karratuak. Teilatu hegala handia da, eta harburuak molduraz apainduak ditu, barroko itxurakoak (angeluetakoak, batik bat).

Egun, Kultur Etxea da eraikin hau, eta Otxandiko kultur elkarteen bilgune.