Deskripzioa eta oharrak:

Durangaldeko Berriz udalerrian dago San Joan eliza. Badirudi XII. mendean fundatu zela. Dena dela, guk gaur egun bisita dezakeguna XVI. mendean hasi ziren altxatzen. Oso egoera onean dago.

Habearte bakarra du, gurutze ganga bakunez estalia, eta ganga horietako giltzarriak apainduta eta polikromatuta daude. Zirkuluerdi formakoa da absidea eta habearteak baino gurutze ganga konplexuagoa du. Kanpoaldetik hamar ostikok eusten diete hormei eta estalkiei. Baditu, gainera, bi arku sendoren gainean ezarrita koru bat eta kanpoaldean kanpandorre bat.

Bi sarbide ditu. Nagusia sartaldera begira dago eta aurrean harmailak dauzka.

Kanpoaldetik eliza harlanduzkoa da; barrualdetik, zenbait gunetan, manposteriazkoa.