Hiru.com

Xabier Amurizaren nobela berria Interneten eskuratu daiteke

Orain ezin naiz hil izenburua darama Xabier Amurizak asteon aurkeztu duen liburuak. 2007an, Joan ziren zazpi eleberrik osatuko duten ziklo marduleko aurrenekoa argitaratu zuen bere kabuz, Dinosauroak horizontean, eta jarraipen honekin ere bere oroitzapenetatik abiatu eta Euskal Herria islatzen saiatuko da Amuriza. Lan berria, baina, www.amurizablogxabier.com webgunean bakarrik eskuratu ahal izango da; nahi duenak doan, eta nahi duenak borondate baten laguntzaz.

Zaldua eta Morillok liburu bana kaleratu dute

Iban Zalduak Euskaldun guztion aberria liburua argitaratu zuen atzo Alberdania argitaletxearen eskutik; Fernando Morillok, bestalde, Zure arimaren truke, Txalapartarekin.

Aita Villasanteren obra digitalizatu egingo dute

Jose Luis Bilbao Bizkaiko ahaldun nagusiak, Andres Urrutia Euskaltzaindiako presidenteak eta Joxe Agirre Arantzazuko Frantziskotarren probintzia ministroak hiru erakundeen arteko elkarlan akordio bat sinatu dute Aita Villasanteren (1920-2000) obra sistematizatzeko eta digitalizatzeko. Ondoren, Bizkaiko Foru Liburutegian gordeko dute.

Durangoko Azokak Juan Zelaia omenduko du

Gerediaga elkarteak Durangoko Euskal Liburu eta Disko Azokaren 2008ko edizioa aurkeztu zuen atzo. Antolatzaileek jakinarazi dutenez, Juan Zelaia o�atiarrak jasoko du aurtengo Argizaiola saria.

I. Bilbo Hiria-Blas de Otero Poesiako Saria Ramirez eta Izquierdo idazleentzat izan da

Bilbo Hiria-Blas de Otero Poesiako Lehen Sariak gaztelaniazko eta euskarazko irabazleak ezagutzera eman ditu; hain zuzen ere, Extremadurako Jose Antonio Ramirez eta Nafarroako Fertxu Izquierdo izan dira.

Juanjo Olasagarreren Ezinezko maletak gaztelaniara itzuli dute

Bassarai Ediciones argitaletxeak Juanjo Olasagarreren Las maletas imposibles (Ezinezko maletak) eleberria kaleratu du, euskaratik gaztelaniara itzulia. Narrazioan, identitatearen borrokari heltzen dio Olasagarrek eta tradizioaren eta modernitatearen kontraesanak agerian uzten ditu.

Nere Lujanbioren Jorge Oteiza. Jenio Hutsa liburuak artistaren obra eta bizitza islatzen ditu

Elkarrek Jorge Oteiza artistaren bizitzari eta pentsaerari buruzko liburu bat aurkeztu du. Lanaren egilea Nere Lujanbio da eta horretan oriotarraren bizitzaren errepasoa egin du.

Irudia eta Finlandia izango dira aurtengo Durangoko Azokaren ardatzak

Gerediaga Elkarteak eta Euskal Idazleen Elkarteak atzerriko literaturgintza Durangoko Azokara ekartzeko ahalegina egingo dute, hirugarren aldiz. Aurreko bi urteetan Esloveniako eta Georgiako idazleak gonbidatu dituzte; aurten, berriz, Finlandiakoak.

Igerabidek Amilami liburua kaleratu du

Juan Kruz Igerabidek Amilami liburua jarri du salgai Elkar argitaletxearekin. Liburuan, Amilami, bere ama bezala, lamia zintzoa den arren, oso onak ez diren pertsonaiak ere azaltzen dira. Kontakizunean Amilami gazteak bizitako abenturak eta larrialdiak kontatzen dira. Istorio nagusiaz gain, lamiei buruzko ipuinak, poematxoak eta aho korapiloak ere ageri dira liburuan.